MEDVEGJASOT.com: Znj. Valbona Thaqi, ju jeni një grua nga Medvegja me vendbanim në Zvicër, e njohur për ruajtjen e kulturës dhe traditës shqiptare. Çfarë do të thotë për ju të ruani këto vlera në mërgim?
Valbona Neziri Thaqi: Ruajtja e kulturës, traditës dhe vlerave kombëtare për mua është detyrim moral dhe shpirtëror. Edhe pse jetoj në mërgim, lidhja me rrënjët nuk është shkëputur kurrë. Këto vlera i kam ruajtur në familje me përkushtim dhe i kam përcjellë me krenari te fëmijët e mi, përmes gjuhës, veshjeve kombëtare dhe respektit për origjinën tonë.
MEDVEGJASOT.com: Për shumë vite jeni nënkryetare e Shoqatës Humanitare “Medvegja”. Si do ta përshkruanit angazhimin tuaj në këtë shoqatë?
Valbona Neziri Thaqi: Angazhimi im nuk ka qenë kurrë formal. Ka qenë dhe mbetet i vazhdueshëm, i sinqertë dhe me shumë dashuri për njerëzit në nevojë. Shoqata “Medvegja” është një urë lidhëse mes diasporës dhe vendlindjes, dhe përmes saj kemi qenë gjithmonë pranë bashkëvendësve tanë, sidomos atyre që kanë pasur më së shumti nevojë.
MEDVEGJASOT.com: Gjatë vitit 2025, keni realizuar disa ndihma konkrete për familje shqiptare në Medvegjë. Çfarë përfshinin këto ndihma?
Valbona Neziri Thaqi: Gjatë vitit 2025, në disa raste, kam shpërndarë pako me veshmbathje për tri familje shqiptare në nevojë në Medvegjë. Këto ndihma nuk ishin vetëm materiale, por përpiqesha që bashkë me to të përcillja edhe ngrohtësi shpirtërore, shpresë dhe mesazhin se ata njerëz nuk janë harruar.
MEDVEGJASOT.com: Cili është mesazhi juaj për lidhjen me vendlindjen, pavarësisht largësisë?
Valbona Neziri Thaqi: Puna, ëndrra dhe dashuria për vendlindjen nuk shuhet kurrë. Edhe pse larg fizikisht, zemra mbetet gjithmonë në Medvegjë. Rrënjët janë të forta dhe ato na mbajnë gjallë shpirtërisht, kudo që të jemi.
MEDVEGJASOT.com: Si e vlerësoni rolin e diasporës shqiptare në Zvicër për Medvegjën dhe viset shqiptare?
Valbona Neziri Thaqi: Diaspora shqiptare në Zvicër ka një rol shumë të rëndësishëm. Me vepra konkrete po mban gjallë frymën e solidaritetit dhe humanizmit në Medvegjë. Kjo ndihmë nuk është thjesht ndihmë materiale, por është respekt, dinjitet dhe shpresë për të ardhmen.
MEDVEGJASOT.com: Faleminderit për kohën dhe kontributin tuaj të çmuar.
Valbona Neziri Thaqi: Faleminderit juve dhe portalit MEDVEGJASOT.com për vlerësimin dhe përkrahjen.
