Tiranë, 7 qershor 2025
Në ambientet e Hotel Tirana u zhvillua një veprimtari me rëndësi të lartë kombëtare dhe shoqërore: tryeza e rrumbullakët me temën “Bashkimi Kombëtar Shqiptar”, organizuar nga Kuvendi Kombëtar Shqiptar në bashkëpunim me Unionin e Shoqërisë Civile, transmeton MEDVEGJASOT.com
Përfaqësues nga të gjitha trevat shqiptare – Shqipëria, Kosova, Maqedonia e Veriut, Mali i Zi, Lugina e Preshevës dhe diaspora – u mblodhën për të riafirmuar mesazhin e qartë dhe të fuqishëm:
“Ne jemi një komb dhe një gjuhë.”
Ngjarja shënoi një moment reflektimi dhe vizioni të përbashkët për të ardhmen e kombit shqiptar. Gjatë tryezës u prezantuan dhe u lexuan kumtesa të rëndësishme nga intelektualë, aktivistë dhe përfaqësues të shoqërisë civile, të cilat u përmblodhën në botimin e ri me titull “Bashkimi Kombëtar Shqiptar”, një kontribut i vyer në arkivin kombëtar të mendimit dhe vizionit shqiptar.
Veprimtaria u vlerësua gjerësisht për nivelin e lartë organizativ dhe për përmbajtjen e saj të thellë intelektuale e kombëtare. Pjesëmarrësit shprehën mirënjohje për organizatorët dhe theksuan domosdoshmërinë e vijimit të nismave të tilla në funksion të bashkimit kombëtar.
Ky takim nuk ishte vetëm një event – ishte një thirrje e përbashkët, një dëshmi e qartë se uniteti shqiptar është i gjallë dhe i pandalshëm.
