Aaron Alijevic, vetëm 12 vjeç, është një talent i ri me prejardhje shqiptare nga Kapiti i Medvegjës, i lindur dhe rritur në Francë, që po tërheq vëmendjen me paraqitjet dhe përkushtimin e tij në futboll.
Aktualisht, Aaron aktivizohet te Jura Sud Foot, ku është pjesë e grupmoshave të reja. Ai luan në pozicionin e mesfushorit, me numrin 5, duke treguar talent dhe seriozitet në fushën e lojës.
Një nga momentet e rëndësishme në zhvillimin e tij ishte viti 2025, kur u përzgjodh ndër finalistët e konkursit “Graine de Footballeur”, organizuar nga District du Jura. Në finale morën pjesë 20 futbollistë të rinj, ndërsa Aaron ishte një nga dy përfaqësuesit e Jura Sud Foot.
Rrugëtimi i tij ka vijuar edhe gjatë sezonit 2025–2026, ku emri i tij është përfshirë në listat e Centre de Perfectionnement Départemental (CPD) të District du Jura, strukturë që identifikon dhe zhvillon futbollistë të rinj me potencial.
Për familjen dhe komunitetin shqiptar, suksesi i Aaronit është një burim krenarie. Me rrënjë nga Kapiti i Medvegjës dhe i rritur në Francë, ai është pjesë e një brezi të ri që po afirmohet përmes sportit.
Në moshën 12-vjeçare, Aaron Alijevic është ende në fillimet e rrugëtimit të tij, por puna, disiplina dhe pasioni për futbollin po i hapin rrugë drejt një të ardhmeje premtuese.
Ëndrra është e madhe, ndërsa hapat nisin që sot. Aaron Alijevic sapo ka nisur të shkruajë historinë e tij në futboll.
Shkruar nga Rrahman Hyseni
