Me rastin e 15-vjetorit të ndarjes nga jeta të studiuesit dhe autorit Ali Maliqi, në Konispol u zhvillua promovimi i veprës së tij “Historiku i Konispolit II”, një botim që i kushtohet historisë së Konispolit, Çamërisë dhe zhvillimeve politike, shoqërore e ekonomike të kësaj treve gjatë një periudhe të rëndësishme të shekullit XX.
Aktiviteti solli në vëmendje kontributin e Ali Maliqit në dokumentimin dhe ruajtjen e kujtesës historike të kësaj treve, duke rikthyer në fokus një vepër me vlera të veçanta për historinë dhe trashëgiminë kulturore.
Bashkia Konispol, në mbështetje të ruajtjes dhe promovimit të vlerave historike e kulturore të zonës, ishte pjesë e këtij aktiviteti, i cili shërbeu edhe si një homazh për figurën dhe veprën e autorit.
“Historiku i Konispolit II” mbetet një dëshmi me rëndësi për të kaluarën e kësaj treve dhe një pasuri e çmuar për kujtesën historike, duke iu përcjellë brezave njohuri mbi historinë, zhvillimet dhe identitetin e Konispolit e Çamërisë.
Shkruar nga Rrahman Hyseni
