Sot, në 148-vjetorin e themelimit të Lidhja e Prizrenit, kujtojmë me nderim dhe krenari një nga ngjarjet më madhore të historisë sonë kombëtare. Në një kohë sfidash të mëdha për fatin e shqiptarëve, burrat më të shquar të kombit u mblodhën në Prizren për të ngritur zërin e një populli që kërkonte të drejtën për të jetuar i lirë, i bashkuar dhe zot në trojet e veta.
Më 10 qershor 1878 u hodhën themelet e organizimit politik dhe kombëtar shqiptar, duke shënuar një kthesë historike në rrugëtimin tonë drejt lirisë dhe shtetformimit. Lidhja e Prizrenit u bë simbol i vetëdijes kombëtare, i unitetit dhe i vendosmërisë për mbrojtjen e tërësisë tokësore shqiptare përballë rreziqeve që kërcënonin ekzistencën e kombit.
Mesazhi i saj mbetet i gjallë edhe sot. Në këtë përvjetor, më shumë se kurrë, ndjehet nevoja për forcimin e unitetit kombëtar, për ruajtjen e identitetit tonë dhe për bashkimin shpirtëror e kombëtar të shqiptarëve kudo që jetojnë.
Me përulësi e mirënjohje të përjetshme kujtojmë atdhetarët që i prinë këtij ideali të madh, brezat që sakrifikuan për ta mbajtur të gjallë flakën e lirisë dhe të gjithë ata që vazhduan rrugën e nisur në Prizren. Kjo rrugë e lavdishme kaloi nga një brez në tjetrin, deri te luftëtarët e Ushtria Çlirimtare e Kosovës, të cilët me sakrificë dhe heroizëm kurorëzuan ëndrrën shekullore për liri, duke i sjellë Kosovës çlirimin në qershorin e vitit 1999.
Lavdi përjetë themeluesve të Lidhjes së Prizrenit!
Lavdi të gjithë dëshmorëve të kombit!
Qoftë i përjetshëm ideali i bashkimit dhe i lirisë shqiptare!
Shkruar nga Rrahman Hyseni
