KRUJË – Për të dytin vit radhazi, qyteti historik i Krujës u bë qendër e një manifestimi kushtuar një prej simboleve më të rëndësishme të traditës shqiptare – plisit të bardhë.
“Festa e Plisit”, e organizuar nga Shoqata Mbarëkombëtare “Bytyçi”, në bashkëpunim me Bashkinë Krujë, mblodhi artistë, studiues, shkrimtarë, poetë dhe personalitete të kulturës nga treva të ndryshme shqiptare.
Në këtë aktivitet, plisi u vendos në qendër të vëmendjes si pjesë e trashëgimisë kulturore, por edhe si simbol i identitetit dhe kujtesës kombëtare.
Pjesëmarrës nga Shqipëria, Kosova dhe trevat shqiptare jashtë kufijve të Shqipërisë u bashkuan në Krujë për të promovuar traditat, veshjet dhe vlerat kulturore të trashëguara ndër breza.
Manifestimi përcolli edhe një mesazh për brezin e ri: simbolet dhe traditat shqiptare duhet të ruhen, të promovohen dhe të përcillen ndër breza.
Plisi i bardhë, i pranishëm në kulturën dhe veshjet tradicionale të shqiptarëve, vazhdon të mbajë një vend të veçantë në identitetin kulturor shqiptar.
Në qytetin e Skënderbeut, “Festa e Plisit” u shndërrua edhe këtë vit në një takim të kulturës, traditës dhe krenarisë shqiptare, duke sjellë së bashku përfaqësues nga treva të ndryshme.
Kruja mirëpret kulturën shqiptare dhe traditat që na lidhin me rrënjët tona.
Shkruar nga Rrahman Hyseni
30 GUSHT 20226
