Prizren, 4 gusht 2025 – Në zemër të qytetit historik të Prizrenit, në sheshin e Lidhjes së Prizrenit, është hapur zyrtarisht edicioni i 17-të i Panairit të Librit, një nga ngjarjet më të rëndësishme kulturore të vitit për këtë qytet.
Organizuar nga Instituti për Kulturë dhe Kërkime Sociale – IKKS, ky panair ka mbledhur në një hapësirë të përbashkët 25 shtëpi botuese nga Kosova, Shqipëria dhe rajoni, të cilat ofrojnë një pasuri të madhe titujsh në gjuhën shqipe, turke, angleze dhe boshnjake.
Panairi, i cili do të jetë i hapur për pesë ditë me radhë, ofron një mundësi të veçantë për lexuesit e të gjitha moshave për të eksploruar botimet më të fundit, për të takuar autorët dhe për të qenë pjesë e një atmosfere që feston dijen dhe leximin.
Çdo mbrëmje, në kuadër të aktiviteteve të planifikuara, do të mbahet një konferencë me një autor të ftuar, ku lexuesit do të kenë rastin të takohen drejtpërdrejt me krijuesit e veprave letrare dhe të diskutojnë për procesin krijues, temat bashkëkohore dhe sfidat e letërsisë.
Drejtuesit e IKKS theksuan se synimi i këtij organizimi është të forcojë lidhjen e lexuesit me librin, si dhe të nxisë një kulturë leximi, veçanërisht tek brezat e rinj.
“Ky panair nuk është vetëm një ekspozim i librave, por një hapësirë dialogu kulturor dhe frymëzimi për të gjithë ata që besojnë në fuqinë e fjalës së shkruar,” – u shprehën organizatorët.
Panairi i Librit në Prizren po rikonfirmohet si një ngjarje kyçe për kalendarin kulturor të qytetit, duke sjellë bashkë lexues, autorë, botues dhe të gjithë dashamirët e letërsisë në një ambient të hapur, mikpritës dhe të pasur me përmbajtje. #MEDVEGJASOT.com
