Rinia jonë në kulturë dhe falënderimi për Zvicrën
Në shoqatën tonë kulturore, janë fëmijët që shkëlqejnë. Të gjithë janë të rinj që kanë lindur këtu, në Zvicër. Ata rriten këtu, mësojnë, jetojnë, ëndërrojnë këtu. Por bashkë me këtë, ata mbajnë gjallë edhe një pjesë të shpirtit tonë: kulturën tonë, vallëzimin tonë tradicional, kostumet tona popullore, trashëgiminë që kemi sjellë nga vendi i origjinës, nga Medvegja, Kosova apo nga trojet tona shqiptare.
Është një krenari e veçantë kur i shohim këta fëmijë në skenë, duke vallëzuar me pasion dhe me kostume që tregojnë rrënjët tona. Edhe pse janë lindur këtu, ata nuk harrojnë nga vijnë. Dhe kjo është e mundur falë mbështetjes që na jep Zvicra, ky vend mik, ky vend që na ka hapur dyert, që na ka pranuar dhe na ka mundësuar të jetojmë me dinjitet.
Integrimi është thelbësor. Dhe në Zvicër, integrimi nuk do të thotë të harrosh kush je, por të jesh pjesë e shoqërisë duke sjellë edhe pasurinë tënde kulturore. Ne e falënderojmë Zvicrën me gjithë zemër për këtë mundësi. Falë saj, mund t’ua përcjellim fëmijëve tanë dashurinë për gjuhën, muzikën, vlerat dhe zakonet tona.
Sepse kur një fëmijë rritet duke e njohur vetveten, ai rritet më i sigurt, më i hapur dhe më i pasur shpirtërisht. Dhe kjo është dhurata më e bukur që mund t’i japim brezave që vijnë.
Nga manifestimi tradicional, Qershor 2025
Valbona Neziri-Thaqi
