Kryetari i Këshillit Kombëtar, Enkel Rexhepi, ka bërë të ditur se me shpërndarjen e librave falas në Medvegjë është përmbyllur procesi i shpërndarjes së teksteve për nxënësit shqiptarë të shkollave fillore në Luginën e Preshevës.
Rexhepi theksoi se kjo nismë merr një rëndësi të veçantë në Medvegjë, ku ruajtja dhe kultivimi i gjuhës shqipe kërkon përkushtim dhe përpjekje të vazhdueshme.
“Çdo libër që arrin në duart e një fëmije është më shumë se një ndihmë për shkollimin. Është një kontribut për ruajtjen e gjuhës shqipe, identitetit dhe qëndresës së familjeve shqiptare në Medvegjë”, është shprehur ai.
Shpërndarja e librave falas synon të mbështesë nxënësit shqiptarë dhe të forcojë përdorimin e gjuhës shqipe në arsim, duke e kthyer librin në një mjet të rëndësishëm të dijes, identitetit dhe qëndresës.
Shkruar nga Rrahman Hyseni
