Rapsodi i mirënjohur i viseve shqiptare, e në veçanti në trevën e Gollakut, u rrit me këngën në kohën që nuk kishte shkollë të muzikës, u frymëzua nga këngëtarët e kohës sidomos nga rapsodi i njohur nga Sfirca, Zajm Beha.
Hetem Hajrullahu lindi në fshatin Sfircë të komunës së Medvegjës në vitin 1954. Së bashku me Qazim Behën, filluan të këndojnë dhe aty mori hapat e parë në luajtjen e çiftelisë dhe veglave të tjera. Ishin kohëra të vështira në rajonin e
Medvegjës pasi UDB-ja jugosllave përcillte çdo lëvizje, çdo këngë të talentëve shqiptarë sidomos në odat tona ku këndohej kënga shqipe. Hetemi ishte këngëtar që këndoi këngë: epike, lirike, dashurie, por në zemër kishte këngën patriotike. Të gjitha këngët e tij të përcjella brez pas brezi, i këndonte me një zë të ëmbël dhe me një talent të mirë këndimi. Me kalimin e kohës, duke iu vështirësuar jeta në fshat, si nga shtypja serbo-sllave, si nga kushtet ekonomike, u detyrua të shkojë në Zvicër.
Me shpërnguljen e tij nga vendlindja, mori me vete edhe çiftelinë. Kënga e tij nuk u ndal as në diasporë, ajo hyri në zemrën e tij edhe më thellë. I shoqëruar me shumë këngëtarë të diasporës, Hetemi nuk ndalej me thurjen e vargjeve dhe me këndimin e tyre në një stil të ri këndimi. Tani nga malli për vendlindjen, këndonte dhe kujtonte në tërësi vendin e tij, Sfircën dhe Medvegjën duke treguar se është një patriot i kombit. Ndihmonte e kundërshtonte çdo gjë që ishte kundër kombit shqiptar. Nuk lejonte askënd ta përmbys kombin. Patriotizmin e kishte trashëgim nga familja e tij e madhe Hajrullahu, ku kjo familje ishte në buzë të kufirit shqiptaro- shqiptar dhe ishte sulmuar në çdo luftë.
BIOGRAFA E HETEM HAJRULLAHUT, BOTUR NË LIBRIN E AUTORIT RRAHMAN HYSENI “ SHQIPTARËT E MEDVEGJËS NËPËR SHEKUJ”
